01 — Trasparence
Trasparence di fonde
Cheste informative e rivuarde la landing meteofriul.it, la web app meteofriul.app e la aplicazion Android. Par consultâ il meteo no covente registrâsi ni inserî dâts personâi. La landing no mostre inserzions e in chest moment no dopre cookie Analytics o pixel di misurazion; la preference de lenghe IT/FUR e reste te memorie locâl dal browser. Se tu nus scrivis vie e-mail, Aruba al trate la direzion e il messaç par rispuinditi e gjestî la richieste. Licencis e atribuzions a son te pagjine Fontis e credits.
Inserzions te app e misurazion
Te web app e te aplicazion Android a puedin comparî card cul segn «Publicitât». Par sielzi lis card la app e conserve dâts sul dispositîf, che tu puedis cancelâ des impostazions de app o dal browser; no podìn eliminâju di lontan. La app e pues inviâ events di visualizazion e vierture: se o ativìn la misurazion tal panel, o conservìn dome conteis par dì, campagne e sezion, no identificatîfs dai utents. O podìn fermâ e cancelâ chestis conteis cence platâ lis card. Come par ogni richieste online, la infrastruture e pues tratâ dâts tecnics, ancje la direzion IP. Vierçint une card tu passis al sît dal sponsor e ae sô informative.
Dâts dai sponsor e dai referents
Par gjestî il rapuart cul sponsor o tratìn dâts di contat e fiscâi dal sponsor e dai referents, contignûts des campagnis, imagjins, paiaments e documents. Dome i contignûts des card a son publics; i altris dâts a restin tal panel riservât. Ju doprìn fintremai che il rapuart al è atîf o che a restin paiaments e fatuuris di sistemâ. Cuant che o sierìn il rapuart, o eliminìn dâts operatîfs e conteis; o conservìn separadamentri i riferiments fiscâi necessaris pai oblics aplicabii e i dâts necessaris par eventualis contestazions. Copiis tecnichis e logs a seguissin i timps de infrastruture.
02 — Sieltis facoltativis
Posizion, notificazions e Sentinellis
La gjeolocalizazion e je facoltative: la web app le rileve dome cuant che tu le domandis; su Android, cun Posizion automatiche e Avîs atîfs, e pues verificâ ogni tant la zone ancje cuant che la app no je in ûs, par ricognossi la localitât, preparâ il meteo e indreçâ i avîs locâi. Lis coordenadis precis a passin in maniere temporanie pal backend; te base di dâts des notificazions a restin Comun o localitât canonics e sul dispositîf a puedin restâ cache meteo e geofence. No costruìn une cronologjie dai spostaments e lis alertis uficiâls FVG no dipendin de posizion.
Lis segnalazions meteo de community (Sentinellis) a mostrin dome il fenomen, la zone, l’orari e lis confermis ricevudis: lis coordenadis precis a vegnin elaboradis par verificâ la zone, ma no vegnin publicadis ni conservadis tal profîl server. Lis segnalazions a restin visibilis par cirche une ore e a doprin une clâf pseudonime derivade di un identificatîf casuâl de instalazion par evitâ abûs e vots duplicâts.
Pai ponts e pal ranc des Sentinellis o conservìn un regjistri privât pseudonim, che nol è visibil ai altris utents: al conten il numar totâl dai inviis acetâts, i ponts e riferiments ai episodis trasformâts in hash; il ranc al ven calcolât dai ponts. Il resum al dure 365 dîs dal ultin inviament acetât, de convalidazion o de revoche; ogni atribuzion di ponts e dure 365 dîs de relative convalidazion o revoche. Cancelâ i dâts de app o cambiâ instalazion al fâs pierdi l’acès ai ponts e al ranc, ma nol cancele subit il regjistri tal server: ae scjadince nol ven plui doprât e la rimozion fisiche e je asincrone.
Se tu ativis lis notificazions push, o gjestìn identificatîf casuâl de instalazion, token Firebase, plateforme, version de app, lenghe, preferencis, Comun o localitât canonics e stât tecnic de consegne. La regjistrazion e ven gjavade cuant che tu disativis la funzion o il token nol è plui valit. Lis regulis completis a son tes Condizions di ûs e Sentinellis.
03 — Sigurece
Dâts tecnics e infrastruture
Par furnî i dâts e protezi la plateforme dai acès automatizâts, o doprìn servizis infrastruturâi standard: Cloudflare e Google Cloud/Firebase cun App Check, reCAPTCHA Enterprise, Play Integrity e Google Play Services. A puedin tratâ IP, orari, dispositîf o browser, richieste, risultât, erôrs, token e altris segnâi tecnics. Google Cloud/Firestore al elabore ancje lis conteis e i dâts aministratîfs des inserzions descrits parsore; Firebase Storage al ten lis imagjins des card. OpenStreetMap, Wikimedia e i server des webcam a puedin ricevi dâts di rêt, localitât o coordenadis cuant che tu domandis i contignûts; Ko-fi al ricêf dâts dome dopo il clic e al apliche la sô informative. Coordenadis GPS e token di atestazion a vegnin elaborâts in maniere transitorie; notificazions e localitât a restin fintremai che la funzion e je ative, preferencis e cache fin ae scjadince o ae cancelazion, invezit i regjistris a seguissin i timps tecnics indicâts di Cloudflare e Google.
04 — Control
I tiei dirits
Tu puedis disativâ la gjeolocalizazion e lis notificazions in cualsisei moment tes impostazions dal dispositîf o dal browser e cancelâ dâts, cache e preferencis locâls tes relativis impostazions. Tai câs previodûts dal GDPR tu puedis domandâ acès, corezion, cancelazion, limitazion, puartabilitât o oposizion e gjavâ il consens, scrivint al contat indicât inte testade. Chescj dirits a valin ancje pai referents dai sponsor pai dâts che ju rivuardin. Tu puedis ancje presentâ un reclam al Garant pe protezion dai dâts personâi.